Fiskiskapurin eftir kongafiski í altjóða sjógvi í Norðurhavi kann byrja 1. juli
![Fiskiskapurin eftir kongafiski í altjóða sjógvi í Norðurhavi kann byrja 1. juli](https://landsstyri.cdn.fo/savn/12373/faroeseseafoodcom-240x139px.jpg?width=1024&height=576&rmode=crop&s=NYK9gLb55DBcDvfCVhdsduhxMIU)
Dennis Holm, landsstýrismaður í fiskivinnu- og samferðslumálum, hevur sent kunngerð um at skipa fiskiskapin eftir kongafiski í altjóða sjógvi í Norðurhavi til hoyringar.
Grundarlagið fyri kunngerðini er eitt NEAFC-uppskot, sum varð samtykt á ársfundinum í november 2023.
Kunngerðin ásetur, at føroysk skip kunnu fiska av eini felagskvotu á 4.139 tons, sum er til øll NEAFC-limalondini. Fiskiskapurin skal sostatt steðga, tá fráboðanir til NEAFC vísa, at fiskifør hjá sáttmálapørtunum samanlagt hava fiskað 4.139 tons í økinum.
Tey fiskifør við veiðiloyvi, sum áður hava haft beinleiðis veiði eftir kongafiski í NEAFC-skipanarøkinum, kunnu luttaka í fiskiskapinum. Talan er um somu skipan, sum hevur verið undanfarin ár.
Fiskast kann í tíðarskeiðinum 1. juli til 1. desember 2024.
Uppskotið til kunngerð um at skipa fiskiskapin eftir kongafiski í altjóða sjógvi í Norðurhavi í 2024 liggur her á síðuni undir ”UPPSKOT TIL UMMÆLIS”.