14.11.2023 · Fiskivinnu- og samferðslumálaráðið

Kunngerð lýst, sum loyvir skipum at landa sild uttanlands fram til 22. november

Kunngerð lýst, sum loyvir skipum at landa sild uttanlands fram til 22. november

Dennis Holm, landsstýrismaður, hevur í dag lýst broyting í kunngerð nr. 170 frá 30. desember 2019 um landing í Føroyum, sum loyvir skipum at landa sild uttanlands fram til 22. november 2023.

Sjófeingislógin ásetur, at øll veiða, undantikin 15%, hjá fiskiførum undir føroyskum flaggi skal landast um bryggjukant í Føroyum. Landsstýrismaðurin kann gera reglur, har loyvt verður í eitt ávíst tíðarskeið at landa uttanlands t.d. vegna vantandi móttøkuorku í háárstíð.

Í løtuni er støðan tann, at nógv føroysk skip eru til fiskiskap eftir sild, og skip hava ligið og bíðað eftir landingartørni. Grundað á hesa støðu hevur Dennis Holm, landsstýrismaður, tikið avgerð um at gera frávik frá galdandi áseting um, at allur fiskur skal landast í Føroyum. Sostatt verður loyvt, at føroysk skip fram til 22. november 2023 kunnu landa sild uttanlands.